Berita Sunda

After Work: “Urang mah mbung serius teuing”

Fakultas Dakwah jeung Komunikasi, khususna warga Jurusan Hubungan Masyarakat (Humas) geus sakuduna bangga, ayeuna ngabogaan band anyar nu ngaranna After Work. Band ieu can lila kabentukna, tepatna kaping 20 September 2014. Lantaran tiap-tiap personilna ngabogaan selera musik nu sarua (Robbie vokalis, Wildan kajon atawa drum, Ijal gitar kadang saxophone, Febrian gitar, Algani bass) nyaeta musik-musik jaman baheula anu aliranna rock-blues jeung deui maranehna kagabung ti jurusan anu sarua, Humas.

Ceuk Robbie, vokalis After Work, nu diwawancara ti telepon (17/12) ieu band teh, band kahiji di Humas. Manehna ge ngajentrekeun naha bet dibere ngaran After Work ieu band teh. After Work the tina basa Inggris anu hartina beres gawe. Tapi, lantaran kabeh personilna teh kuliah keneh, jadi jang maranehna mah kuliah teh gawe, maranehna latihanna unggal balik kuliah, tara saacan kuliah da meh jongjon. “Tah mun disambung-sambungkeun oge pan mun beres gawe teh pikiran lepas, santai, tah urang ge hayangna mah kitu, bermusik the santai, lepas kitu eweuh beban” ceuk Robbie.  

Lantaran ieu band anyar keneh, manggung-manggungna ge masih di wilayah bandung. Ti café ka café atanapi ti kampus ka kampus. Tapi pernah oge, sanajan ngan sakali kaluar kota manggungna, ka Karawang. Masalah tarif, Robbie ngedarkeun yen maranehna mah masih keneh hayang ngenalkeun band maranehna heula, “ Masalah tarif mah urang masih keneh hayang ‘berjihad’ nya, hayang ngeksiskeun ngaran urang heula weh, tapi biasanamah urang narima ti panitia limaratus rebu” jelasna bari seuri.


Selama ieu, maranehna mun manggung masih keneh mawakeun lagu batur, tapi ayeuna maranehna keur proses nyieun lagu sorangan. Ngaranna oge band, pasti wae aya niatan nyieun album jeung asup dapur rekaman, kitu oge jeung After Work, maranehna ge aya niatan rekaman jeung rilis album, tapi maranehna ngarasa materina can cukup jeung duit oge can kakumpul.

Harepan kahareup na After Work, nya pasti jiga band-band nu sejen nu bisa kasohor, asup tipi, disorot ku media-media, tapi salian ti eta, Robbie ngaharepkeun yen After Work tetep kompak, jarang aya masalah. “Da urang mah mbung serius teuing, urang mah hayangna semi serius we meh aya rasa senang-senangna ge aya, meh eweuh beban. Pokonamah intina urang mah hayangna senang-senang we meh jongjon” pungkasna bari seuri. (Ari Wahyuni/Jurnalistik 5A)